"सडेतोड आणि स्पष्ट लिखाणातून सामान्य जगण्यातले प्रश्न आणि त्यांची उत्तरे शोधून देणारे आणि खिळवून ठेवणारे लिखाण म्हणजे बॅरिस्टर अनिरुद्ध धोपेश्र्वरकर ही कादंबरी"

 

बॅरिस्टर अनिरुद्ध धोपेश्र्वरकर...

लेखक : भाऊ पाध्ये

बऱ्याचदा आपण एखाद्याने सांगितल्यावर एखादा पदार्थ खातो आणि मग त्याचे अगदी चाहते बनतो, ती आपली चव बनून जाते. अगदी तसंच भाऊ पाध्ये यांचे लिखाण माझ्या आयुष्यात आले आणि माझी चव बनून गेले. या लेखकाचा चाहता झालो. 

वासूनाका,राडा यानंतर हे पुस्तक म्हणजे समाजभान, मनातील कालवाकालव यांचे अगदी भेदक वर्णन करणारं जबरदस्त लिखाण. भाषा उगाच गुळगुळीत नाही पण खिळवुन ठेवणारी. 

तर बॅरिस्टर असूनही वकीलीत विशेष रस नाही, आयुष्यात प्रियंवदा अगदी सुंदर बायको पण तिच्या विषयी विशेष आकर्षण नाही, घरात अलोट श्रीमंती पण तीचं विशेष कौतुक नाही, शेजारी पाजारी यांच्यात सहभाग घेण्यात रस नाही असा जीवनपट ढकलत असलेले धोपेश्र्वरकर वकिली सोडून, मी का जन्माला आलो? आपल्या जन्माचा उपयोग काय? या प्रश्नात अडकून, याचे उत्तर शोधण्यात गर्क आहेत. प्रियंवदा, वडील तात्या, मित्र चक्रपाणी यांनी कित्येकदा समजावून पण यांना न जुमानता आपल्याच तंद्रीत जगणारे धोपेश्वरकर यांच्या आयुष्यात क्लाडा आणि आयव्ही या दोन मुली येतात आणि स्वतःच्या तंद्रीत मश्गूल असणारे धोपेश्वरकर वेगळ्याच प्रकारे जगायला लागतात. त्यात या दोघींचा बॉस असलेला राय हाही यांच्या गँग मध्ये सहभागी असतो. 

इकडे पत्नीला कसल्याच प्रकारचा प्रतिसाद न देणारे धोपेश्र्वरकर क्लाडा आणि आयव्ही यांच्यात मात्र रमु लागतात. हे सगळं घडत असताना अचानक एक घटना घडते ज्याने धोपेश्र्वरकर यांच्या आयुष्याला वेगळी कलाटणी मिळते, त्यांना या घटनेमुळे घर सोडावं लागतं, काय नक्की घडलं असेल? क्लाडाला हळूहळू धोपेश्र्वरकर आवडू लागतात, पण परिस्थिती मात्र निराळी असल्याने धोपेश्र्वरकर मात्र हे सगळं सोडून दूर जातात, का जाता असतील? आयव्हीला  धोपेश्वरकर का दुर घेऊन जातात? बेजबाबदार स्वभावाचे धोपेश्र्वरकर एकदम जबाबदार व्यक्ती म्हणून कसे बदलतात? आयव्हीच्या मृत्यूला ते कसे सामोरे जातात? प्रियंवदाला हे सगळं कळल्यावर ती जेव्हा धोपेश्र्वरकर यांना थेट त्याठिकाणी भेटायला आल्यावर कशी वागते? आणि शेवटी ती त्यांना परत आपल्या संसारात रमण्यासाठी तयार करते का? कारण आता प्रियंवदा गर्भवती आहे हे समजल्यावर धोपेश्र्वरकर काय विचार करतात? या सगळ्या प्रश्नांच्या उत्तरासाठी आपण हे पुस्तक वाचणे अत्यंत गरजेचं आहे. 

जगताना माणसाला कायम पडणारे साधे प्रश्न पण त्याची याच जीवनपटातून उत्तरे देण्याचा लेखकाचा अगदी सडेतोड प्रयत्न फारच भावणारा आहे. स्त्री आणि पुरुष यांचा संबंध आणि यातून देव या वृत्तीचा नक्की काय विचार असेल याचे उत्तर वाचताना अगदी बुध्दीला आरश्यासारखा स्पष्ट वाटतो. कुठे ही लिखाणात बढेजाव नाही अगदी सरळ स्पष्ट लिखाणातून सामान्य जीवनातले प्रश्न आणि उत्तरं याचं समर्पक लिखाण म्हणजे "बॅरिस्टर अनिरुद्ध धोपेश्र्वरक ही कादंबरी"...नक्कीच वाचावी अशीच.